Manzumar Tauhidi da Aƙida (2)

 Manzumar Tauhudi da Aƙida (2)

Ma'anar Musulunci

20. Ma'anar miƙa kai ga Jallah shi kaɗai

Lura da ɗa'a shirka i mata wadai

21. Da kore duk bautar wani Ilahu

Roƙonsa fata jingino Allahu.

Rukunan Musulunci

22. Shahada ce a farko sai ko Salla

Mai binsu Zakka azumi ka kalla 

23. Ƙarshensu Hajju mai iko yana tafe 

In ka riƙe su rayuwarka ƙarfafe

24. Amma na farko shi ne dai mabuɗi 

Dominsa yaƙi anka tsaida ba haɗi

25. Mai rushe ɗansa ya rushe dininsa 

Ƙimarka kare dukka martabarsa 

Sharuɗan Shahada 

26. Ka san manarta sai ka san sukuni 

A farko sai yaƙini anka nuni 

27. Kula a zuci zahiri gare ta 

Karɓarka duk hukunci da batunta

28. Ihlasi a cikinsu na da ambato

Sai gaskiya ta zuci babu yin zato

29. Ka so ka ƙi dominta don fitarka

Sharɗanta bakwai sunka zo gare ka. 

Manzumar Tauhidi da Aƙida (3)

Ma'anar Imani

30. Manar imani aiki ce da furuci

Furci na zuci harce zo ga tsokaci

31. Aiki na zuci harce har da gaɓɓai

Ƙarinsa da ragi ko tabbas ba wai

32. Biyayya ce take kai shi samaniya

Saɓo ko ƙas ke kai shi can cikin wuya.

33. Da shi fikonka ke zama ga ɗan uwa

Ba tantama halinsa ne ko hauhawa

34. Imani shi ne gaskatar Ilahu

Mala'iku da Littafan Allahu 

35. Ranar Ƙiyama Manzanni da Ƙaddara

Ta hairi sharri dukka dai ya tattara. 

Kashe-kashen Tauhidi

36. Tauhidi na da nau'uka guda ukku

Gare ka za ni zayyano da babbaƙu

37. Nau'i na farko Tauhidin Ibadati

Kaɗaita Jallah kar ka yo ta'annuti 

38. Kaɗaita Allah da batun halitta

Da arziƙi da nau'ukan bajinta

39. Shi ya biyo shi babu mai jaya da shi

Sai na ukunsu kar mu yo wasa da shi

40. Kaɗaita Allah a cikin siffa taSa

Da sunaye da ayyukan kama taSa. 

©Ibrahim Lawal Soro

   11. 09. 2022 CE.